गोमटें गोंय गायता
संगिताच्या निजान ताच्या
निर्मितल्यान होरायता...
नाचता तालार ल्हारार ल्हार
जुवारेचीं पांयजणां
वाजता सुरान एक तान
मांडवीचीं मांदोलीना...
माड-माडयो म्हण्टी मांडे
शब्दुल्यांचीं दुल्पदां
जायां-जुयां परमळांत
आबोलेचीं मोनी पदां...
मृदंगाचो बोल जसो
दुदाचो घसघसो
पानां-पोवनां मारता मोखून
वाऱ्या वांगडा पिंपळ पिसो...
सोबीत सुकणीं नाचता देखणी
रुखां रुखां कणकणीं
वाजपा नादार धेमता पळय
जाग्रणाची रात राणी...
सुर्या हांसता दर्या गाजता
धर्तेरेक होरायता
गोड गोड मेकळ्या गळ्यान
गोमटें गोंय गायता...
जन गण मन अधि नायक
मेकळे गोंयचें गीत आयक
दोरे मी फा सारे नी सा
आमचें गोंय गायता...
No comments:
Post a Comment