हवामाना विशींची आमची भासाभास सुरू जाली
जाचे विशीं आमकां सगळ्यांकूच उमळशीक आशिल्ली
तशें पळोवंक गेल्यार हांव आनी आमचे मदलो कोणूय
हवामाना विशीं किदेंय उलोवंक शकतात
आदार आनी आदारा बगरूय
घडये तर्कानूय
मागीर करूं तुमी तुमचो तर्क, शास्त्रशुध्द
हांवेंच सुरवात केली कपला वयलो घाम पुशीत
गरमी इतली जाता की पावस पडटलो नक्की
तशें हांवें पळयलां सपन
मळबभर कुपांचें
दोळेभर पावसाचें
म्हाका घेराव घालून म्हजे सरभोंवतणी
म्हज्या शिरंतरांनी झडटना
म्हज्या विचारां भशेन
आनी जीवसृश्ट परत संवसार रुपांत येतना
नागड्या झाडांक कोमरी येतना
आनी जीव-जंतूंच्या रुपांतलो मनीस संवसार मापतना
एक मनीस म्हाका चूक म्हणीत
जनेलांतल्यान भायर पळयता
सद्याच्या हवामाना वयल्यान
आनी ह्या उबाळांत तो मुखा वयल्या
धा-पंदरा वर्सांचें अंदाजपत्रक सादर करता
जातूंत पावसाचो आसपाव खंयच नाशिल्लो
म्हजें कुपांनी भरिल्लें मळब ताणें निवळ केल्लें लख्ख उजवाडाचें
नागड्या-उगड्या जमनी वयल्यान
एका पोंता वयल्यान दुसऱ्या पोंतार
आमी पळोवंक शकतले एकामेकांक
भेंडांत बाग घेवन लेगीत
तरीय जगतलो मनीस किड्या-किटाणूं भशेन
समर्थां खातीरच्याच अधिकारांचें आरक्षण करून
दुसरो एक मनीस आवाज वाडोवन
जमनीचे अवस्थे विशीं उलयता
नागड्या रुखा विशीं सांगतना
गाडलेले, सांडलेले संदर्भ तो उगडास करता
ताचे कालेती प्रमाण मोटवे जाल्ले ताचे विचार
तो मांडूंक शकना सारके
तरीय ताच्या विचारांचेर उक्तेपणान चिंतपाचें
तो आवाहन करता
दुर्बिणीच्या हारशांतल्यान आतां आमी सगळ्यांनीच
हवामानाचो वेध घेवप गरजेचें
आमचे भासाभाशेंत
आमी केन्नाच रावले नात आमचे भितर ओगी
म्हणुनूच आमी विचारविनिमय
चालू दवरूंक शकले हवामानाचेच गतीन
सगळ्यांचो एकूच सूर आशिल्लो
सगळे खुशालभरीत आसचे
बऱ्या खिणांक वेधून घेवन
संवसार संतुलनांत रावचे
