गोड म्हजें गोंय! सुंदर म्हजें गोंय!
पुर्विल्ले नामनेचें, चड मोट्या भाग्याचें,
उंच माथें कोंकणाचें,
हें म्हजें गोंय!
निजाचे अपुरबायेचें, इंद्रनीळ मळबाचें,
भांगराच्या ओताचें, रुप्याच्या चांदन्याचें,
हें म्हजें गोंय!
पथीक उदका-वाऱ्याचें, चकचयाळ पिकावळीचें,
सोबीत फुलां-फळांचें, शिटूक सावदां-सवण्यांचें,
हें म्हजें गोंय!
उजळ संस्कृतायेचें, खरेल्या कुळवंतांचें,
उदार मनाच्या लोकांचें, पाटांगड्या विद्वानांचें,
बळिश्ट झुजप्यांचें, बुदवंत राजकरण्यांचें,
वावराड्या कामवटांचें, कर्तुत्वी मनशांचें,
हें म्हजें गोंय!
धर्तरेवयलो सर्ग, हें म्हजें गोंय!
सासणाचें सूख-दिणें, हें म्हजें गोंय!
No comments:
Post a Comment