हांवेंच घडयल्या
हांवेंच चिरल्या
वाटे वयले कांटेखुंटे
हांवेंच मोडल्यांत
जायते फावटीं
म्हजे हातपांय
तांकां फारावल्यात
म्हज्या रक्ताचे
दागूय तांचेर उदेल्यात
वाटे वयले फातर-गुंडे
हांवेंनूच हुमटायल्यात
देंगणांतल्या काळखांत
तांकां हांवेंनूच लकयल्यात.
आयज म्हज्या कश्टांचें
सार्थक जालां
म्हजी वाट आयज
हांगा मेरेन पावल्या
हांवेंनूच ती पावयल्या
घडयले तिचो प्रवास
आनिकूय उरला जायत
कांय जाण ती
आपली म्हूण चिरतात
म्हजो तांचेर
इल्लोय शीण ना
कित्याक तर
म्हजें जैत.. हांवूच जाणां
No comments:
Post a Comment