प्रयोग - आर. रामनाथ

तूं तुज्या पांयांचे तळवे

म्हज्या पांयांच्या तळव्यांक

घट्ट बांद

आनी तुजीं दुकां झडयत झडयत

भुंयेंत तूं मुंगरत राव खोल खोल

हांव हांगा वाडत रावतां मळबाचे दिकेन उंच उंच...

तेवटेन तूं पाताळाक मळबाचें अप्रूप सांग

हेवटेन हांव मळबाक पाताळाचें अप्रूप सांगतां

मागीर कालांतरान -

आमी दोगूय मेळून एक वर्तुळ काडुया

परतून एक फावट आमी दोगूय

एकमेकाक मेळुयात

आमी दोगूय किदेंतरी वेगळेंच करयात

आमी ब्रह्म वेंगावया...