नुस्त्याचें नाटक – अना म्हांबरो

न्हंयेच्या पात्रांत
जालें एक नाटक;
नांव ताजें
“संगीत महाभारत.”
सगल्या नुस्त्यांनी
घेतलो तातूंत वांटो
स्टेजमास्तर जालो
आगशीचो शेंवटो.
विस्वण जालो
तालीम-मास्तर
गोवर्‍याक म्हणूं लागलो,
“भीमा, गदा धर!”
कळंगुटची शेंवटाळी
जाली सुभद्रा
तांबाशाक म्हणूं लागली,
“आरे क्रिश्णा, तूं म्हाजो दादा!”
द्रौपदी सोबली
मुरगांवची मुड्डशी;
खर्चांडेक म्हणूं लागली,
“तूं म्हाजी दाशी!”