नवें गोंय-नवें गोंयकार - बयाभाव

तुमी करात जयजयकार - 'नवें गोंय - नवें गोंयकार !'

ते मेंगे आनी आळशी

मत्सरी आनी दुस्वासी

पेजेन निखटे धादोशी-

रावचे नात ह्या मुखार- - 'नवें गोंय - नवें गोंयकार !'

ते फाटले दीस गेले!-

आयकून वोगी रावंचेले

हे नवे सूर्य उदेले -

आतां दितले परतो मार! 'नवें गोंय - नवें गोंयकार !'

तो राष्ट्रकुटांचो देस

वीर्यवंत कोंकणी भास

जावची नात कोणाची दास-

जरी दिलीं सुळा-गोळार- 'नवें गोंय - नवें गोंयकार !'

तरसादी आनी भाले

तुबरां नाळींचे गुळे

ते कित्याक उपकारतले?

हे जाले कुडीर उदार- 'नवें गोंय - नवें गोंयकार !'

जरी तुटली तांची मान

जंववेर कुडींत हे प्राण

घेवचे नात एक फाटल्यान-

जें घालें पावल मुखार- 'नवें गोंय - नवें गोंयकार !'

मळबांत वीज कडकडली

धर्तरी सकल गडबडली

धिटाची एकत पुतळी-

पळोवन संवसार धीर- 'नवें गोंय - नवें गोंयकार !'