दर्यांतलें व्हडें कशें
जिवीत म्हजें चल्लें फुडें
वादळांतल्यान वाट काडीत
फुडाराचेर नदर मारीत
आलतडसून पलतडी
तुरू तुरू धांवता अशें
पयलो वयलो हावेस ताचो
वयर वयर उडटा कसो
मकळटना ताच्या मना
सासायेचें गीत जशें
रंगरंगयाळीं ताचीं शिडां
कातरीत अशीं वादळा मोडां
दिल्लें उतर पाळतलें
सैमाचें राखून हांशें
उजवाडाचो दिवो
पयस असो उजवाडाचो पेटला दिवो
तेच दिकेन मारता पावल दीसरात
वाट आसा सताची, निधर्माची
वळखना हांव जात, कात, पात
हावेसाचो हुमरो हुपून येता सुर्या
ल्हारां उचांबळून कर्तुबांचो गाजता
दर्या
शांत अशा मनाचो आसा म्हाका सांगात
सपनांत दिसता क्रिश्त सोडटना प्राण
खिणांत तोखेता रामाचें कार्य म्हान
अल्ला, महमद, बुध्द दितात हात
आयज म्हजें काळीज येता फुलून
एकवटाचें दायज वता भुलून
गोंया वांगडा देशाची पेटयत वात
No comments:
Post a Comment