हांगा जण एकल्याचो
एक देव आसा
एक मनीस एक देव
दोन मनीस दोन देव
तीन मनीस तीन देव
गांवागांवांत देव
वाड्या वाड्यार देव
तिठ्यार देव
तिस्कार देव
आतां देव रस्त्यांचेरूय पावल्यात.
देवाचे हांगा वांटे घाल्यात
हे जातीचो देव
ते जातीचो देव
मनीस श्रीमंत जाल्यार
श्रीमंत देव
मनीस गरीब जाल्यार
गरीब देव.
इतलेय देव उणे म्हूण
थोड्या मनशांकूय हांगा
देव केल्यात
तांकां पालखेंत बसयतात
तांका रथांत बसयतात
तांकां खांदार घेवन मिरयतात
तांच्या खांदार घेवन मिरयतात
तांच्या पांयां कडेन नाकां झरयतात
हांगा देवा खातीर
झगडीं चलतात
देवळांच्या हक्का खातीर
मारामार्यो चलतात
देवाचेर शेक गाजोवंक
झुजां चलतात
हांगा मनिसूच
देवाचेर नदर दवरता
देवळांतल्या पुजार्याचेर
नदर दवरता
देवळांतलो पुजारी
ताटांतल्या पयशांचेर
नदर दवरता
देवाक भजपाचें मात
कुशिनूच उरता.
हांगा इतले देव जाले तरी
मनीस अजून देंचारूच उरला
आपलें देंवचारपण लिपोवंक
देवाक हाणें दावणेक बांदला.
No comments:
Post a Comment