तुळशी पेडये वयलें
निरंजन
पेटोवंक
आवय म्हजी
आंगणांत येता
दीसभर
झाडाझाडार हेडपी सवणीं
पांखा
पांखातले रंग ओतीत
भिर्याभिर्यांनी
घोंटेरांत येतात
देवळांतले
नबतीची शेनाय
वाजूंक लागता
तेन्ना
म्हज्या गांवांतली सांज येता
फटी खोंकीत
खोंकीत
कोप मारूंक
मांयले गादयेर वता
आनी तेच
वाटेंतल्यान
शेजारचो
चंद्री कीलभर तांदूळ,
च्याचो पालो,
साकर आनी
फांतयेच्यो
बिस्कुत्यो घेवन
घरांत भितर
सरता
आनी
चैत्रांतलो चांफो कसो
ताच्या बायल
भुरग्यांच्या ओंठांचेर
हांसो फुलता
तेन्ना
म्हज्या गांवांतली सांज येता!
सांकवा
सांकवार
कुळवाड्यांची
गर्दी जाता
विडये,
शिगाराचे झुरके मारीत मारीत
तिठ्यार
चकाटां रंगार येतात
आनी
विठ्ठलाच्या भज्यांच्या वासान
सगळ्यांच्याच
तोंडाक लाळ सुट्टा
तेन्ना
म्हज्या गांवांतली सांज येता
गांवचे म्हजे
सांजेक
लय आसा ताल
आसा
मळबांत
लुकलुकपी नखेत्रांचो
उजवाड आसा
खोबरें मळपी
पारकाराल्या घाण्याचो
ठेको आसा
गांवची म्हजी
असली सांज
तुमकां शारांत
केन्ना दिसल्या व्हय?
No comments:
Post a Comment