देवा तुजी लागल्या गोडी
मेळटा समादी ध्यानान
सोंपता जिणे काडाओडी
वचत थंय तूंच दिसता
सूंच भितर सांसपिता
कातकुल्यांनी सहज हांसोवन
मारता मायेची बडी
ध्यान तुजें भोंवतना
गळोभर कामांत आसतना
आवय जशी सानुल्याची
करता याद घड घडी
आतां चड उणें खंय
मुक्त अनंततायेची वंय
आलतड पलतड जाल्या एक
ना कसली चडचडी
अनादी अगम्य परतत्व
अनादी अगम्य परतत्वांतल्यान
म्हजे मेरेन पाविल्ली ही
रंगरंगयाळ्या लखलखीत दिव्यांची रांक
ही रांक एका एका दिव्याक
क्रमाक्रमान पेटोवन
आनी फाटल्यान एका एका दिव्याक
पेटपाचे तयारेंत दवरून
गेल्या शेणून वयर
अनादी अनंत परतत्वांत
काळाच्या हुंबराचेर
ह्या दिव्यांक अखंडीत पेटत दवरून
सृजनाचीं अजापां करपी
हो कोण अनामीक कलाकार?
ह्या
दिव्यांची जिवासाणीची उर्जा
पातळायता
म्हजेर चुंबकी किरणां
आनी हांव
हालून जातां
उर्जेचो
सृजनकार
सैम-सृश्टीक
लसलसत दवरपी
हो अनामीक
कलाकार
अनादी अनंत
परतत्वांतल्यान
एक एक
उत्क्रांत दिवो पेटोवन
घालता
उत्थानाचें उमाणें
No comments:
Post a Comment