कविता रुसून आसा – पुंडलीक नायक

कविता म्हजेर रुसून आसा

व्यभिचारी घोवाचे बायले भशेन.

होरावणी, विनवणी व्यर्थ,

तिचें वर्तन अतर्क्य.

तिचें नदरेंतूच प्रस्न-

काल गिताच्या तालार

धूंद-फुंद जावन नाचतालो

तो तूंच न्हय?

आनी पयर कथेची किरंगळी धरून

गर्देंत भोंवर मारतना

आपलो आपणाकूच शेणोवन बशिल्लो!

आनी अयर,

नवरंगी फूल गाविल्ल्याच्या आनंदान

आख्खी रात

नाटका वांगडा खेळ करतालो!

आनी अयरच्या अयर,

कादंबरो वांगडा आपणाक

पणाक लावन,

आपलोच जिणेचें कपयाळें जोडीत बशिल्लो!

 

कविता म्हजेर रुसून आसा

व्यभिचारी घोवाचे बायले भशेन