म्हजो दीस जालो तेन्ना
रात आसली
आवय थोडी रडली
रडटां रडटां हांसली
आजयेन नातवाक चोवपाक
दिवलेंतली वात सारली
त्या वेळार मळबांतली वीज घरांत देंवूंक
नासली.
पाखो जोती भोंवतणी गीर गीर उडलो
फडफडलो पडलो
हांव ओगीच रडलों
वैजिणीन म्हणलें चलो जालो!
आजो
मिशयांचल्या मिशयांत हांसलो
बापूय बरय
बरयतना
मातसो थांबलो
पणजेन उखल्लो
मावशेन
सांसपिलो;
शेजान्नीन
पारखिलो
दिसूंक काळो
माजराचो पिलो!
सगलें घर
जागें जालें
पयलोच जालो
बरें जालें!
हें सगलें
मागीर हांवें आयकलें
त्या वेळार
म्हाका दिसनासलें
आयकूंक
येनासलें
पूण अशेंच
घडलां जातलें
म्हजी आजी
सदांच सांगताली
तूं जाल्लो
तेन्ना रात जाता
तेन्ना
ओगीच म्हाका
दिसता
म्हजो जल्म
जाता...
No comments:
Post a Comment