जाल्ल्या दिसा यादी - बाकीबाब बोरकार

काळखांत तुका दिसचो दिवो 
दर्यांत तुका मेळचें तारूं 
अंतीं वादळां मोडां हुपून 
तुज्याच स्त्रध्दे – धक्यांत थारूं 

जरीय आमी आसलीं पैस 

जीव आमचो तुजेच सरीं 

सुखांत पसून तुजे यादीक 
आमच्या दोळ्यांत दुखां-झरी 

तुमी दोगय पूत म्हळ्यार 
मळबांतले पांखटे म्हजे 
तुमच्या धिरार, तुमचे आशेर 
तोलतां आठय दिकां वजें 

दीस आमचे उल्ल्यात थोडे 
बळगें तांचें तुमकां मेळूं 
पुण्याय कितें पदरिं आसल्यार 
तुमच्या शिरंत्रानीं खेळूं 

सगळ्या संता-दीस अशे 
आषाढांतले एकादशीक 
भाग्याचो जल्म तुवें 
मोगान घेतलो आमचे कुशीक 

पुरसा आनी पंचिष्टांची 
आसची तुजेर सदांच राखण 
लोकिक तुजो जाल्लो पळौन 
आमकां गोड जावचें मरण 

जाल्ल्या दिसा यादिन आज 
आमच्या दोळ्यां-आरत तुका 
आंगणांतल्या केळी भशेन 

येवंत मोके तुज्या सुखा