आयलां थंय स्वातंत्र्य तें स्वातंत्र्य न्हय, स्वातंत्र्य न्हय
जे घरांचे खणपी वाते
तेच जंय सन्मान्य दाते
धमार्थ जंय दारांत तांच्या सज्जनांचीय लागता लय
वाटमारे चोर खुनये
जंय प्रजेचे मुख्य थेलये
सत्ताय जंय तांच्या भंयान मारता मिठा नीती नी लेय
पाडसावयले कुंवाळे
काल धवशे आज सांवळे
जंय सदा खुबळावन भौसा व्होतां खातीर घालती शबय
घाण स्वार्था जंयचे बरपी
वाचतल्यांचे त्राण चिरपी
दिवंक जळ लटक्या अधर्मा काट्टी उजळ उत्रां-कलय
पेज सामको भौस जंयचो
फोव सो कोणेंय कांडचो
पेट्टल्यांचे पांय चाट्टा, पिडटल्यांचो गायता जय
आप जंयच्या सगलें भश्टें
वंद्य परक्यांलेंच उश्टें
हुटकेती तांच्या भितोडे मेळटा ती उखलूंक तळय
पोट ही जंय एक निश्ठा
त्याग कश्टांची कुचेश्टा
जीव आसल्यार खावं भिकेचें होच जंयचो दिग्वीजय
आयलां थंय स्वातंत्र्य तें स्वातंत्र्य न्हय, स्वातंत्र्य न्हय
No comments:
Post a Comment