मंद मंद वाजत आयलीं तुजीं गो पांयजणां
मौन पडलें सगल्या राना
शिरशिरून थांबलीं पानां
कंवळी जाग आयली तणा झेमतां झेमतना
पयसुल्यान वाजली घांट
दाटलो न्हंयचो कंठ कांठ
सांवळ्यांनी घमघमाट सुटलो त्या खिणा
फुल्ल्यो वैर चंद्रजोती
रंध्रांनीं लागल्यो वाती
नवलांचीं जावंक लागलीं शकून लक्षणां
गळ्यां सुखां, दोळ्यां दुखां
लकलकलीं जावन थिकां
नकळटनां एक जालीं आमी दोगांय जाणां
वडफळांच्या अक्षदांत
कितलो वेळ न्हायत न्हायत
हुपले कितले चंद्रलोक, इंद्रनंदनां
तांतलें कांय नुल्लें आज
सगल्या जिणे आयल्या सांज
तरीय अकस्मात तुजीं वाजतीं पांयजणां
कानसुलांनी भोंवती भोंवर
आंगार दाट फुलता चंवर
पट्टी केन्नां सपनां तींच घट्टी जाग्रणां
No comments:
Post a Comment