तुजें म्हजें उतर जालां काजच्या मळ्यांत
अमृताची धार गो आमच्या लग्नार वोतूं गो
बऱ्या वायटा रिवाजींची तकली तिणें भेतूं गो
तुजो म्हजो रोस घडो अर्द्या वळ्यांत
हाड चेडवा बुडकुलो लकय तळ्यांत
पादरी चीट वाचीना, वडील माटव रचिना
म्हज्या तुज्या बऱ्या फाल्यां सोयऱ्यां सावळी येची ना
पादरी सोयरे व्हाळून वचों, व्हाळच्या व्हाळ्यांत
हाड चेडवा बुडकुलो लकय तळ्यांत
करियमणी बांदिना भांगार शिंगार घालिना
आमच्या व्होरा मुखल्यान गो रसमागाडी वेची ना
म्हजें तुजें लगीन घडूं मोगरे कळ्यांत
हाड चेडवा बुडकुलो लकय तळ्यांत
धोल घुमट नासतना, गरनाळींचो नाद ना
पेंपाऱ्याचो साद ना, आपल्या पेल्या वाद ना
काजाराचें गायन गाजों कोगळी गळ्यांत
हाड चेडवा बुडकुलो लकय तळ्यांत
सात सात जाकिना चोवदा जातीत मूं सान्नां
सान्नांचीय पर्वा ना, सोयरें धायरें आसचें ना
आमच्या लग्ना काफये संभ्रम पाव पेळ्यांत
हाड चेडवा बुडकुलो लकय तळ्यांत
बुडकूलो गो आयलो ना, तळ्या उदकांत लकलो ना
दस्तुऱ्यांचे पाजे मुखीं तरनो तकलो ठिकलो ना
आमच्या लग्ना आंवडो गो सुकलो गळ्यांत
हाड चेडवा बुडकुलो लकय तळ्यांत
हाड चेडवा बुडकुलो लकय तळ्यांत
आजुन तुका राकून रावलां काजच्या मळ्यांत
No comments:
Post a Comment