थेंब दोळ्यांतलो तुज्या
जाला म्हजो वलो
ताण
ताण पाणयार म्हाका
तारी तांणी केलो
गेलो
गेलो पाणयाचो तोल
ताचो जालो मगा बोल
खोल
खोल खोलायेची ओल
तुज्या ओंठांनी गो सोल
सोल
सोल खरायेची ओल
घे गो दोळ्यांतुलो वलो
तुज्या
तुज्या थेंब्यांतुले वसाडीन
तोल भोंवर्याचो गोल
रूंव रूंव पेट्टा
म्हजें रूंव रूंव पेट्टा
तरिकूय म्हाका दिसता
हो दिवाळेच्या पणट्यांचो थाट
अडीअडचणींतल्यान
काळखा हुंवारांतल्यान
जेन्ना तूं म्हज्या मागार येतलें
तेन्ना ह्याच तांबशा उजवाडांत
तुजीं कानसुलां तांबडीगुंज जावंक जाय..
जोतींच्या परजळान
तुजे ल्हवें कणकणीं
हाते फुलोवन
परमळाची रास करून
नागांकूय नागवण जावची
अशी नागशेर
तुवें वाजोवची
हेच खातीर
म्हजें रूंव रूंव पेट्टा
देखूनच म्हाका दिसता
हो दिवाळेच्या पणट्यांचो थाट...
No comments:
Post a Comment