जेन्ना तू नदरे पलतडी आसता
तेन्ना एकमुळो आसना
तुजे भोंवतणी भोंवत आसता
राखणेचें वज्र जावन
आमचे मायची सासाय
तूं जेन्ना कश्टून कश्टून
सामको खासावीस जातलो
कूड विसव घेवंक सोदतली
तेन्ना आमचीं मागणीं आनी
पुण्यायेचें बळ तुका मेळटलें
जेन्ना तूं शिंयान कुडकुडटलो
आंगार कांटो फुलतलो
भंयान अर्दो मेल्लो जातलो
तेन्ना शांतपणान दोळे बंद करून
खीणभर आमची याद कर
तुज्या तनांत आनी मनांत
जोगला वरी तेज संचारतलें
जेन्ना वतान करपतलो
मेंदू उसळूंक लागून
दोळ्यां मुखार काळोख दिसतलो
तेन्ना अजिबात भियेनाका
आमी रूख जावन तुका
मायेचे सावळेंत धांपून घेतलीं
जेन्ना जेन्ना तुजेर विकल्प येता
तेन्ना म्हज्या काळजाच्या पड्ड्डयाचेर
तुजें हांव प्रतिबिंब पळयतां आनी
तुजे खातीर मागतां हात जोडून
बापायची मुस्तायकी
पापा, तुजें खोमीस म्हाका
जायते फावटीं भुजांचेर चडयनशें
दिसतालें
तुजे फाटल्यान तें
चडोवचें पडलें तेन्ना
तुजे फाटीच्या कण्याक
कित्या खातीर बाग पडल्या
ताचें गुपीत समजलें
पापा, तुजें काल्सांव म्हाका
न्हेसचें दिसतालें
पिराय जातकच न्हेसलों तेन्ना
तुजें भेंड कित्या खातीर धरतालें
त्या गणितांतलें सगलें होलमलें
पापा, तुजी तोपी
एक दीस माथ्याक घालपाची
मनांत इत्सा आसली
जेन्ना हांवें ती म्हजे
तकलेचेर दवरली तेन्ना
म्हजी तकली चिड्डली आनी तुजे तकले वयले केंस
कित्या खातीर गेल्ले
ताची काणी लक्षांत आयली
पापा, आतां म्हाका
तुजे बूट घालपाक जाय
म्हजे बूट आतां म्हाका वचनात
रस्तो लांब आसा
जिविताचो पर्वत ऊंच आसा
तुजे बूट घालून
सडसडीत तुरतुरीत चलपाक जाय
No comments:
Post a Comment