वयर वयर जमनी वयल्यान
निळ्याशार मळबा पेल्यान
सुकिल्ल्या काश्ठांतल्यान
लिवलिवीत विलुदाचे आंकरे-तुरे
लुकू लुकू नदरेचे कोंबार कोंब!
आंकर्यांतल्यान
आठूय
दिका...सय रुतू,
सर्वय काळ...
पानां जाळें
सपनांचें पाचवेंचार
गारेगार,
बारदार!
रुखातळा,
सकलाच्यान
वयल्या सपनां
तोल पेलपा
अब्ज कर्व
परार्धांनी
पाळांच पाळां
मुळार मुळां
खोल खोल
पाताळां
वळ वळ
वळ...वळा वळा
तळा वसल्यान
पाचूंच्या जाळ्यांतल्यान
काश्ठांच्या
माळ्यांतल्यान
फुलां फळां,
रूप रंग गंधाचो
केदो भार! भार भार
अपरंपार!
तळा पोंदच्यान
काळखां गुपाट
पर्वतां, कोटी
मणां चेपणा खाला
ह्या भारा
भारावपी...
रूप रंग
गंधाकू
फुलांतल्यान
फळांतल्यान
थारावपी...
रुपाची
रंगसाणू
सुवासाचें
मुळावणू
भुकेतानेन
वसवशिल्ल्या
रेश्मा-केंसां
जिबल्यांतल्यान
तापीत तोपीत...
शेशासाई
बोंबलेंतल्या
कमला देंठा
आरपार!
चोखीत चोखीत
धर्तरेचे
वलसाणीचीं
उदकां गार
मातयेच्या
अमरत्वा
अमृतधार!
No comments:
Post a Comment