भाव गेले भयणी गेल्यो
यादींच्यो रोयणी गेल्यो
सोबीत सपनां राती गेल्यो
देवा फुडल्यो वाती गेल्यो
धोंपर फुटत खेळप गेलें
एकामेकां फाटल्यान धांवप गेलें
रडटां रडटां हांसप गेलें
हांसता हांसता रडप गेलें
खंय गेली कागदाचीं
उदकांतली व्हडीं?
आमी आतां उस्तितात
एकामेकांची
मडीं
दारां आनी
जनेलांच्यो
जाल्यो आतां
वणटी
गर्भकुडींत
पालवली
एकूच एक पणटी
एकाचीं
शाणेपणां
दुसर्याचीं
पिशेंपणां
कोणें तरी
घराचीं
खणलीं रे
सोंपणां
घरा फुडलो
हुमटलो
पार्दिकाचो
रूख
दाव्या
दोळ्यान पळोवं नजो
उजव्या
दोळ्यांतलें सूख
आतां
एकामेकांचो
कोणाक ना
हुसको
म्हज्यो घराक
आतां
हांव जालां
परको
No comments:
Post a Comment