दिश्टावो सर्वज्ञ सासायेचो – प्रकाश पाडगांवकार

जाला म्हाका दिश्टावो सर्वज्ञा सासायेचो

जाची विशालकाय रावल्या दिगंत व्यापून

ताच्या सुर्यवर्की सांगाताच्या वातावरणांत

जीण नव्या सपनांतल्यान जागी जावन

उस्फुट्टा म्हज्या अस्तित्वाचे परिमाण

 

ताच्या स्पर्शान जावन सताड उकती

फिशालकाय क्षितीजरुपी रंगयाळ्या विस्ताराची

जिणे नदरेक कीर्ण-तासांरुपी मोरपाखांचे तेज चडून

आंवळून येवन एकवट्टात सामकीं आशिकुशीक

रुतू वैभवाचीं पिकां काडीत रावपी साम्राज्यां

 

जाला म्हाका दिश्टावो सर्वज्ञा सासायेचो

जो म्हजो जिणे ग्रंथ बरयता सुवर्णाक्षरांनी

मौनाच्या अधिराज्याचीं किरणां झंकारायत

फुलयत चिरंजिवी सोबीतकाय प्राणांत

 

मुखार साकारिल्ले दोंगर आडखळींचे

ताच्या एकाच इशार्‍यान आपशींच विरगळून

भागता ताटांत येवन  पडिल्लीं तृप्त वैभवां

आसक्ती वीण ल्हवल्हवसो फुलून फुलत रावपाक

 

ईश्वराचें भिंग

निराकार –ईवराचें जिवें चुंबक्रियेचें भिंग

तातूंतल्यान प्रकटलां लख्ख ब्रम्हांडाचें बिंब

हें बिंब परावतींता सजीव चित्रां तासातासांचीं

जल्मून अचळय विस्तारतले आकाशगेंगेची

जाका सांगात कालातीत चैनत्यशक्तीचो

 

ह्या भिंगाचो घेवचो थाव एकचीत एकाग्रतायेन

भितर थिरायत भव्य अंतराळ दिव्य महासागर

किर्णां शिवरावपी माणकां-मोतयांचे विशाल दोंगर

अलंकारांनी शिंगारिल्ली शुध्दतायेन फळून पिकिल्ली

झाडांपेडांची नटून थटून सजिल्ली कलाकुसर

 

ह्या भिंगांतल्यान चिरंजिवी अश्टताशी रंगी-उजवाड

जाता कोटी सुर्यांचें आगटें ब्रम्ह निर्मणेच्या रसायणाचें

जें जिवावळींचे काळ प्रसवणे शक्तीप्रवाह पेरून

भोगयता निराकार ईश्वराचे नवे अविश्कार कल्प-कल्पांतराचे

जे जिवेताल्ल सासणा खातीरच्या आदी –अंताचे प्रक्रियेचें