पुस्तकांनीय आसता गच्च भरिल्लें
एक सनातन मळब
म्हणुनूच उतरांच्या कुपांनी उमाळून येवन
तें घसघश्यांनी बरसत रावता
तेन्ना मात आपणें धर्तरेचें रूप घेवन
पावसाचीं पावलां रिगोवपाचें सामर्थ्य
दाखोवचें पडटा, शब्दांत शब्द मुंगरून
नव्या समीकरणा खातीर
नाजाल्यार पुस्तकां आनी आपल्या आसपांतले
जाणिवेचो संदर्भ खंयच उरना
आनी उतर मागीर उतर उरना
उतर बोंतर जाता
म्हूण दरेका उतरांतल्या गाभ्यांत वचून
विस्कटावन मेकळीक सादपाची आसता
नाजाल्यार तिनूय काळांची नोंद
मागीर एक फकत फटास जाता.
पुस्तकांचो आसता आदार
अपेक्षीत पावलाचे दिकेन
घडये उजवाडाचीय सुलूस घेवन
तेन्ना आपणें फकत मनाच्या अवकाशांत
घोंटेर बांदपाचे तयारेक लागून
अवकाशाकूय पालय आयिल्ल्याचें पळोवपाचें आसता
पालय नव्या रुखाची घडये नव्या संस्कारांची
नव्या विचारांची
आनी नव्यान जाणवल्ल्या संदर्भांची
पुस्तकांकूय आसता स्पर्श आनी दृश्ट
पूण ते खातीर आपणें आपलें मन
तयार करचें पडटा
संवेदनांच्या सांच्यांत घालून
मागीर पुस्तकां कशीं शिंवरायतात
चारूय रुतूंच्या चारूय सुवाळ्यांची खोशी
हें आपणें अणभवप आसता
पुस्तकांत काळीज दवरून.
काळखांतूय पुस्तकां आपले दोळे उकते दवरतात
आनी कोणाचोय हात धरून पळून वतात
कोणा बाराबर रिगचें
हाचें भान दवरिनासतना
पुस्तकां आदार दितात
पुस्तकां दुख्ख दितात
तरीय तीं येत रावतात
बदलत्या हवामानाक अणसरून
पुस्तकांच्या मळब मनांक शीम नासता
तेन्ना कोणें वादांत वच्चें न्हय
निश्काम कर्मयोग्याच्या
जंय सावन यादींचें इंधन घाळ पडटा
थंयच्यान पुस्तकांचें फुडारपण जाणवता
पुस्तकां रान रुखां पेडांचे
आपले मतींतल्या झिलकुटांचें तर न्हयच
म्हण आपणें कांय वगत
भोंवडेकार जावन रुखांचे सावळेचो
आडोस घेवन बसपाचें आसता
शब्दांतल्यान उजवाडा कडेन वचपा खातीर
तेन्ना घडोवं येता साक्षात्कार
बुद्धम् शरणम् गच्छामिच्या सर्वस्पर्शी मंत्रघोशाचो
गुरुत्वाकर्शणाचो
पुस्तकांय रचयतात आपलेंशें एक जग
त्या जगांत आपणेंच आपले नदरेंत
वलसाणीचें सपन पळोवपाचें आसता
काळजांत सुर्याचें शेत पिकोवपाचें आसता
उरता जाल्यार जीण वाचून जाल्ल्या
पुस्तकांच्या पानार दवरपाची आसता
कानफोडीच्या पानां भशेन
अशी जीण पयलीं सोंपता
आनी फाटल्यान पुस्तकां वाचपाचो ध्यास उरता
चिरंतन
No comments:
Post a Comment