मळबाच्या दर्यार
सुर्याचें व्हडें गा
सुर्याचें व्हडें...
एक सारकें रातदीस
घुंवता बावडें...
पोनेळ ना, कुरवो ना
व्हले उलांडी ना
साठी ना, मठी ना
येरें वा दोरां नात.
येरें धरपाक
तारी ना
दोरां ओडपाक
शिडां सोडपाक
मानांय वा पोरां नात.
वार्या वसाडीचें
व्हडें तडीक
काडपाक
आलाशिर्याचो
मांगर ना
चक्रा शिडाक
आळाबंदा हाडून
उसरपत घेवपाक
एक सादो
नांगर ना
आदाराचो सांगड ना
आनी वांगड?
आपलेच सावळेचो
लेगीत
वांगड ना...
अशें हें
व्हडें
सुर्याचें
व्हडें गा
सुर्याचे
व्हडें...
आसा म्हणपाचें
फकत
एक चक्र
चकचकीत,
झगझगीत
खतखततीत,
धगधगीत
उज्याच्या
दिव्याचें
रसरशीत
लोळाचें
ब्रेक
नाशिल्लें... चक्र
नखेत्रांच्या
खडपांतल्यान
वाट सोदून
काडपी
रात मोडून दीस
हाडपी
दीस फोडून रात
जोडपी
गिरीगिरी, गिरीगिरी
चक्र
लिकीलिकी,
भांगराचें वक्र...
कोट्यांनी
कोसां वयल्यांक
साता समद्रां
पेल्यांक
उजवाड दीत
जीण दीत मोग
दीत
मोगा आशेर
आपले वरीच
आपलेय भोंवतणी
गिरगिरत
दवरीत...
मात
लागशिल्ल्यांचो
एका खिणांत
पुरायेन कडोवन
धुंवर करपी
अशें हें चक्र
हूं वा चूं
करिनासतना
मात
पसून...कर्रss..कूर्रss
धर्रss..धूर्रss
करिनासतना
खट्ट वा खूट्ट...फट्ट
वा फुट्ट
लेगीत
करिनासतना
एक सारकें
रातदीस घुंवता
बावडें
चक्राचें
व्हडें गा
सुर्याचें
व्हडें.
भोंवता
आपल्या
चक्राचे
गळिल्ले आंस
सोदीत?
तुट्टिल्ले
ब्रेक सोदीत?
काय चक्र
पालोवपाचो
शेणिल्लो
स्वीच सोदीत?
घुंवता
शिणिल्ल्या
शिडाक
मायेचो वाव
सोदीत?
...मळबा
बुडिल्लो
बंदराचो गांव
सोदीत?
...कडिल्ल्या
नांगराक
न झडपी दोरी
सोदीत?
काय, रातभर
काळोख...
आनी परतेंय
दीसभर, उजवाड
सोदीत?
शिरी शिरी,
शिरी शिरी
पेंवता बावडें
सुर्याचें
व्हडें गा
सुर्याचें
व्हडें.
कितलेंय घुंव
घुंव
घुंवयत रावत
तरीय, आसा
तशेंच
आसा थंयच
पावता
अशें हें
व्हडें
अजापा कुवाडें
उजवाडाचें एक
पोंत
काळखाचें
दुसरें पोंत
उजवाडा फुडें
चल चल चल
तरीय, चलत
तितलें थोडें गा
सुर्याचें
व्हडें
हें सुर्याचें
व्हडें...
No comments:
Post a Comment