पुनव – विजयाबाय सरमळकार

आयली दुदाळ पुनव

घोगो चान्न्याचो वयल्यान

धरतेचे हांडीचेर

कळसो अळकनता भरून।।1।।

 

आयली रुपेरी पुनव

भरती आयली समुद्राक

फेणेराच्या हारशांत

रूप दाखयता चंद्राक।।2।।

 

आयली मोगाळ पुनव

पामरी पांगरून रुप्याची

मळबाचे तबकडेंत

निरांजनां नखेत्राचीं।।3।।

 

आयली शितळ पुनव

ओड लायता नवरुपेक

सर्ग भुंयेचो एकचार

मोग दाखयता जगाक।।4।।

 

आयली धवीच पुनव

शालू बुट्यांचो न्हेसून

चुडो जुयांचो माळून

आखो तिखो करून।।5।।