भुजाभुजांनी पखवाज वाजले
कुडीचो चल्लो पार रे
हाता-हातांच्यो घुडयो नाचल्यो
सर्वांगाचेर भार रे
कानसुलांनी ताळ रंगले
शिरंतरांनी तार रे
पावला पावलांनी धित्रां घुमता
गजर गाज साबार रे
रुंवारुंवांनी वाती उजळ्ळ्यो
भोंवतणीं शिरंगार रे
हो पार रंगलो आरपार
उमाळ्यांचे हार रे
लोकीक पिशें देव उस्तिता
अलोकीक पारार रे
चेवूच जालो देव म्हगेलो
दिश्टाव्या चिंगार रे
No comments:
Post a Comment