एका बांगर बैलान
आतांच दावें तोडलां
गवण मोडून
भल्ल्या गोठ्यांतल्यान
बैल उबी दोंड हुपून गेलो
रूखां-झोपां माड्डीत गेलो
शिंगार रगत माखयलें
कपलार तिबे सोबयले.
बैल शिरेर मदेल्लो
बैलान धेंकर गाजयलो
बैलान पागोच बदल्लो.
बैलान जूं शेडायलें
नांगर-गुटे मोडयले
बैलान किरय किरयलें
घट थंय जिरयलें.
कासऱ्या कानयेक बदना
बैल चेचूंक जमना
बैल विकूंक फावना.
बैलाक म्हज्या किरोंवदी
जाय तसो मिरोवंदी
बैल फुडल्या पाडव्या येंवचोना
पुजेखातीर तिश्टचोना
जाय तसो जाय तेन्ना येतलो
शिंगां दाखोवन पुजून घेतलो
बैल म्हज्या बावन्न कुळांचो उध्दारी
बैल म्हज्या कुळाचो वारस.
No comments:
Post a Comment